د مهترلام ښاروالۍ له لوري د سایهبانونو د لګولو پروژې چارې ۹۰ سلنه بشپړې شوي
د مهترلام ښاروالۍ له داخلي بودیجې د شاوخوا دوه میلیونه افغانیو په ارزښت د ښاروالۍ په انګړ کې د موټرو او وسایطو د خوندي ساتنې په موخه د سایهبانونو (څپرو) د لګولو پروژې چارې په چټکۍ سره روانې دي، چې تر دې مهاله یې ۹۰ سلنه کارونه بشپړ شوي او پاتې چارې یې په منظم ډول جریان لري
مهترلام ښاروال الحاج مولوي رحمتالله شهامت وویل، چې دغه پروژه د دې لپاره پلي کېږي، ترڅو د ښاروالۍ ماشینري، موټرونه او نور وسایط له لمر، باران او بېلابېلو طبیعي آفتونو څخه خوندي وساتل شي
نوموړي زیاته کړه، چې په یاده پروژه کې درې سایهبانونه جوړېږي، چې له ډلې یې دوه د ۲۵ مترو په اوږدوالي او ۱۳ مترو په پلنوالي او یو بل یې د ۱۳ مترو په اوږدوالي او ۷ مترو په پلنوالي جوړېږي، چې اوس مهال یې د جوړولو چارې ۹۰ سلنه بشپړې شوې دي
د یادونې وړ ده، چې د دغو سایهبانونو په بشپړېدو سره به د ښاروالۍ ماشینري او وسایط په خوندي چاپېریال کې وساتل شي او د خدماتي فعالیتونو د دوام لپاره به لا ښه زمینه برابره شي
