جماعت په جماعت د ښاري فرهنګ د پوهاوي پروګرام اړوند يو شمېر علماوو سره مشورتي ناسته!
مهترلام ښاروال مجاهد رحمت زي د مهترلام ښار يو شمېر علماوو او د مساجدو خطيبانو سره ( جماعت په جماعت) د ښاري فرهنګ پوهاوي پروګرام د غوره تطبيق په موخه مشورتي ناسته وکړه.
په دې ناسته کې لومړی د مهترلام ښاروالۍ د ښاري حکومتولۍ امر بختيار حسين خېل علماوو ته هرکلی ووایه او ياد پروګرام يې د ناستې ګډونوالو ته تشريح کړ او ددې پروګرام اصلي موخه يې هم ګډونوالو ته روښانه کړه.
حسين خېل دا پروګرام د ښاروالیو معینیت، د ښاري حکومتولۍ د عمومي ریاست د پلان شوو پروګرامونو يوه برخه وبلله او له علماوو يې وغوښتل، چې په دې برخه کې ستاسو رول خورا زيات ارزښتمن دی.
ورپسې د ختيځ زون علماوو شورا رئيس مولوي فرمان الله اخندزاده او نورو څو تنو علماوو هم خبرې وکړې، د جماعت په جماعت پروګرام د تطبيق هرکلی يې وکړ.
دوی د ملي او ټولنيزو برنامو د تطبيق په برخو کې د علماوو د رضاکارې همکارۍ ډاډ ورکړ؛ دغه راز ښاغلو علماوو په مهترلام ښار کې د غوره نظم د رامنځته کولو او د غصب د مخنيوي په برخو کې يو شمېر ستونزې ښاروال سره هم شریکې کړې او د حل لپاره يې خپل نظريات هم مهترلام ښاروال سره شريک کړل.
په پای کې مهترلام ښاروال مجاهد رحمت زي ښاروالۍ سره د علماوو د رضاکارې مرستې کولو د ژمنې مننه وکړه او په دې برخه کې يې د دوی د ځانګړې لېوالتيا لرلو ستاېنه هم وکړه.
رحمت زي د ښاري فرهنګ پياوړتيا او د عام ولس د پوهاوي په برخه کې د علماوو او د ښار د نخبه اشخاصو رول مهم او ګټور وباله.
ښاروال مجاهد رحمت زي ټينګار وکړ، چې علماء او د ښار نخبه اشخاص بايد د ښاري نظم رامنځته کولو او د غصب د مخنيوي په برخو کې ښاروالۍ سره لازمه همکاري وکړي.
په درنښت
۱۴/۲/۱۴۰۰
