د مهترلام ښار د زرغونتیا په موخه د نیالګیو کېنولو لړۍ پیل شوه

د مهترلام ښاروالۍ له داخلي بودجې د مهترلام ښار د سمسورتیا په موخه د ۴ زره میوه لرونکو او غیرې میوه لرونکو نیالګیو کېنولو لړۍ نن د مهترلام ښاروال الحاج مولوي رحمت الله شهامت او د ښاروالۍ د امرینو، مدیرانو او کارکونکو له لوري پیل شوه
د یادو نیالګیو کېنولو پر مهال مهترلام ښاروال وویل: دا چې د اوسني نظام موخه او هدف وطن ابادول او سمسورول دي، هر څه یې په عمل کې ښودلي او نن مو د وطن د ابادولو او زرغونولو یوه بله لړۍ پیل کړه چې د مهترلام ښار په ټولو ناحیو کې به نیالګي کینول شي
د مهترلام اوسیدونکو او نبات پيژندونکو د ښاروالۍ رياست دغه کړنه وستايله او زیاته یې کړه چې په دې سره به مهترلام ښار نور هم زرغون شي، د اکسیجن تولید به زیات شي، ناروغۍ به کمې شي او چاپیریال به ورسره پاک شي
د یادونې وړ ده چې تیر کال بیا د مهترلام ښاروالۍ له لوري په مهترلام ښار کې ۱۱ زره میوه لرونکي او غیرې میوه لرونکي نیالګي کېنول شوي ؤ چې د ټولو په منظم شکل ښه پالنه او ساتنه شوې ده