د مهترلام ښار د پراختیا په موخه له ښار څخه موټر پلورنځي پنځمې ناحيي ته انتقال شول
مهترلام ښاروالۍ د ښار د پراختیا او خلکو ته د کار روزګار برابرولو په موخه د مهترلام ښار د موټرو بارګینونه (موټر پلورنځي) د پنځمې ناحيي اړوند کابل ـ جلال آباد اډې ته انتقال کړل.
مهترلام ښاروال الحاج مولوي رحمت الله شهامت چې له یادو بارګینونو څخه یې لیدنه کوله وې ویل، دلته د موټر پلورونکو لپاره ډیر سهولتونه برابر شوي د هر بارګین لپاره نیم جریب ځکه ورکړل شوې ترڅو په اساسي او معیاري شکل جوړ او ګټه ترې واخیستل شي.
نوموړي وویل، یاد اقدام مو د ښار د استقامت او پراختیا په موخه کړی دی، هیڅ یو موټر پلورنځي ته په ښار کې اجازه نه ورکوو ترڅو پیر او پلور وکړي، ټول د بارګیتونو مسؤلین به یاده ساحه کې خپل کاروبار کوي.
مهترلام اوسیدونکي د ښاروالۍ د یاد کار ستاینه کوي او وايي، چې له دې سره ښار پراختیا مومي، د ګڼې ګوڼې مخنیوی کیږي او خلکو ته د کار کولو زمینه برابریږي.
د یادونې وړ ده چې مهترلام ښاروال شپه ورځ د مهترلام ښار د پراختیا او د ګڼې ګوڼې د مخنیوي په موخه نه ستړې کیدونکي هلې ځلې کوي.
