د مهترلام ښاروالۍ له لوري د سرک د قیر اچولو چارې پیل شوې
د مهترلام ښاروالۍ له داخلي بودیجې څخه د ۱۲ میلیونه افغانیو په لګښت د لومړۍ ناحیې اړوند د دارالمعلمین په مسیر د سرک د قیر اچولو چارې پیل شوې
د یادې پروژې چارې چې د نجیب لمر ودانیز او سرک جوړونې شرکت له لوري پرمخ روانې دي نن مهترلام ښاروال الحاج مولوي رحمت الله شهامت د مسلکي او تخنیکي انجنیرانو په ملتیا له کارونو څخه یې لیدنه وکړه او په اړونده مسؤلینو باندې یې ټینګار وکړ ترڅو کارونه په اساسي او معیاري شکل ترسره کړي
ښاروال وویل، چې دا پروژه د ښاروالۍ له داخلي بودیجې څخه د شاوخوا ۱۲ میلیونه افغانیو په ارزښت تمویل کېږي، چې پکې د ۳۰۰ مترو په اوږدوالي او ۱۵ مترو په پلنوالي د سرک قیر اچول او د چړایي جوړول شامل دي
نوموړي زیاته کړه، چې د کار چارې په چټکۍ سره روانې دي او ډېر ژر به پروژه بشپړه او د عامو خلکو د تګ راتګ لپاره پرانېستل شي
د یادونې وړ ده، چې د دې پروژې په پلي کولو سره اوس مهال په ورځني ډول نږدې ۵۰ کسانو ته د کار کولو زمینه هم برابره شوې ده
