د مهترلام ښار اړوند د ګمین کلي لپاره ګذر وکیل ټاکل کېږي
د مهترلام ښار اړوند د ګمین کلي یو شمېر مشرانو د خپلې سیمې لپاره د ګذر وکیل د ټاکلو په موخه د مهترلام ښاروالۍ د ښاري حکومتولۍ آمر الحاج عباس عمري سره ناسته ترسره کړه
د سیمې مشرانو په پیل کې د ښاروالۍ له ریاست مقام څخه مننه وکړه، چې د ګمین کلی یې د ښاروالۍ په چوکاټ کې شامل کړی دی
هغوی غوښتنه وکړه، چې د سیمې د ستونزو پر وخت حل او له ښاروالۍ سره د ښې همغږۍ په موخه دې ورته یو ګذر وکیل وټاکل شي
د ښاري حکومتولۍ آمر الحاج عباس عمري ټولو راغلو مشرانو ته د ښه راغلاست ترڅنګ ډاډ ورکړ، چې د ښاري حکومتولۍ د طرزالعمل له مخې به د ټول کلي په رضایت یو خدمتګاره او وړ شخص د ګذر وکیل په توګه وټاکل شي
د یادونې وړ ده، چې د ګمین کلی په روان کال کې د مهترلام ښاروالۍ په چوکاټ کې شامل شوی، چې له دې وروسته به پکې د ملک پر ځای ګذر وکیل فعالیت کوي
