د مهترلام ښار د زرغون چاپېریال لپاره هڅې روانې دي
د مهترلام ښاروالۍ د تنظیف او سرسبزۍ مدیریت له لوري د مهترلام ښار د پارکونو او ګلدانونو د منظم کولو او خړوبولو چارې په منظم شکل جریان لري
د یاد مدیریت د سرسبزۍ مامور، انجنیر ریحانالله آریان، وایي چې دوی هره ورځ له پارکونو او د ښار له ګلدانونو څخه څارنه کوي او د زرغون ساحو د خړوبولو، پاک ساتلو او ښکلي کولو لپاره یو منظم پلان لري
د هغه په وینا، د اوبو رسونې یو معیاري سیستم یې جوړ کړی چې له لارې یې ټول نیالګي او شنې ساحې وخت پر وخت او په منظم ډول خړوبېږي او همداراز د نیالګیو او زینتي بوټو قینچي کاري هم ترسره کېږي
نوموړي زیاتوي" چې د ښار زرغون چاپېریال د ښاریانو د آرام، روغتیا او خوښۍ لپاره ډېر مهم دی، نو له همدې امله هڅه کېږي چې دا بهیر دوامداره وساتل شي
د مهترلام ښار اوسېدونکي هم له دغو نوښتونو خوښ دي، او له ښاروالۍ څخه غواړي چې د پارکونو، شنو ساحو او ښاري ګلدانونو ساتنې او پراختیا ته لا زیات پام وکړي
