له امراضو او حشراتو څخه د نباتاتو د ساتنې په موخه دواپاشي ترسره شوه
د مهترلام ښاروال الحاج مولوي نظر محمد عتیق په ځانګړي هدایت د مهترلام ښاروالۍ د تنظیف او سرسبزۍ مدیریت له لوري په پارکونو، ونو، بوټو، ګلانو او چمنونو باندې د دواپاشۍ چارې پیل شوي، چې نن د یادې دواپاشۍ په لړ کې د دریمې ناحیې اړوند د ډاکټر محمد ظاهر پارک کې دواپاشي ترسره شوه
د مهترلام ښاروالۍ د سرسبزۍ مامور ریحان الله اریان وویل، چې یاده دواپاشي د نیالګیو، بوټو، ګلانو او چمنونو د بېلابېلو امراضو او زیانرسوونکو حشراتو څخه د ساتنې په موخه ترسره کېږي، تر څو شنې ساحې خوندي پاتې شي او د ښار ښکلا نوره هم زیاته شي
هغه زیاته کړه چې نن په دریمه ناحیه ډاکټر محمد ظاهر پارک کې یاده دواپاشي ترسره شوه او دا چاره به په ټولو پارکونو کې عملي شي
