مهترلام ښاروال د ښاروالۍ له روانو پروژو څخه د لیدنې ترڅنګ د کار په ښه کیفیت ټینګار وکړ
مهترلام ښاروال الحاج مولوي رحمت الله شهامت چې د ښاروالۍ تخنیکي او مسلکي برخې انجنیرانو یې ملتیا کوله د کډوالو چارو ریاست ترڅنګ د سرک کانکریټ اچونې او د دارالمعلمین په مسیر د چړايي د جوړیدو له پروژو څخه لیدنه وکړه
په یاده لیدنه کې ښاروال د پروژو مسؤلینو باندې ټینګار وکړ چې کارونه په میعاري او اساسي شکل د پلان مطابق ترسره کړي
هغه همداراز د ښاروالۍ له انجنیرانو وغوښتل چې د کار له جریان څخه دوامداره څارنه وکړي تر څو چا ته د بې کیفیته کار کولو موقع برابره نه شي
نوموړي زیاته کړه: "د خلکو خدمت زموږ لومړیتوب دی او موږ نه غواړو چې دا پروژې یوازې د نندارې لپاره وي، بلکې د خلکو د ژوند د اسانتیا لپاره باید رغنیز کارونه معیاري او دوامدار وي."
ښاروال وويل، د ښاروالۍ د هرې پروژې لپاره ځانګړې مسلکي انجینران ټاکل شوي که د پروژو مسؤلینو په کارونو کې غفلت وکړ او یا هم بې کیفیته کار یې وکړ دوی به ورسره قانوني چلند وکړي
