په پنځمه ناحیه کې د مستریانو لپاره ځایونه وټاکل شول
د مهترلام ښار د پراختیا، د ښاري نظم د ټینګښت او د ګڼې ګوڼې د مخنیوي په موخه، مهترلام ښاروالۍ د ښار د مستریانو د انتقال لپاره د پنځمې ناحیې اړوند د کابل ـ جلالآباد هډې ترڅنګ په ترمینل کې ځانګړي ځایونه مشخص کړل
د یادو ځایونو د ټاکلو بهیر د مهترلام ښاروال الحاج مولوي نظر محمد عتیق، د تخنیکي او مسلکي چارو آمر انجنیر زاهدالله مجددي، د عوایدو او محاسبې آمر حاجي محمد زبیر سالار، د پنځمې ناحیې مدیر محمد منیر فاروق، د اصنافو رئیس حاجي محمد طالب خپلواک او د مستریانو معاون بشرمل په حضور کې ترسره شو
مهترلام ښاروال د مستریانو معاون ته سپارښتنه وکړه، چې د ښار ټول مستریان راټول او ټاکل شوي ساحې ته انتقال کړي، ترڅو له یوې خوا د ښار پراختیا او ښاري نظم پیاوړی شي او له بلې خوا د ګڼې ګوڼې ستونزه راکمه شي
ښاروال همداراز ټینګار وکړ، چې هر مستري ته به ځانګړی ځای ورکړل شي او له دې وروسته به هیچا ته اجازه ورنه کړل شي، چې د ښار په بېلابېلو سیمو کې په غیر منظم ډول کاروبار وکړي
د یادونې وړ ده، چې تر دې وړاندې د مهترلام ښاروالۍ له لوري د موټرو بارګینونه هم همدې ساحې ته انتقال شوي او اوس مهال خپل فعالیتونه په منظم او ټاکلي ځای کې ترسره کوي
