د مهترلام ښاروالۍ ملکیتونو څخه لیدنه وشوه
مهترلام ښاروال الحاج مولوي نظر محمد عتیق چې د لومړۍ ناحیې مدیر ملا عباس ابراهیمي او د املاکو مدیر محمد اصف یې ملتیا کوله د لومړۍ ناحیې اړوند د ښاروالۍ له یو شمېر ملکیتونو څخه یې لیدنه ترسره کړه
د دې لیدنې موخه د ښاروالۍ د ملکیتونو د وضعیت ارزونه، د شته ستونزو ګوته کول او د خدماتو د ښه والي لپاره لازم تدابیر نیول وو
ښاروال په یادو ملکیتونو کې له شته کاروباریانو سره وکتل او هغوی ته یې سپارښتنې وکړې، چې د چاپېریال پاکوالي ته جدي پاملرنه وکړي او د ښاروالۍ شتمنۍ د امانت په توګه وساتي
نوموړي ټینګار وکړ، چې د ښاروالۍ ملکیتونه د عامه شتمنیو برخه ده او ساتنه یې د ټولو ګډ مسؤلیت دی او باید په ښه شکل وساتل شي
همداراز، ښاغلي عتیق په دې لیدنه کې هغه ملکیتونه چې ترمیم ته اړتیا لري له نږدې وکتل او اړوندو مسؤلینو ته یې لارښوونه وکړه، چې د ترمیم چارې دې په چټک او معیاري ډول پیل او بشپړې شي، ترڅو یاد ملکیتونه د ښاریانو د خدمت لپاره لا اغېزمن وکارول شي
